陳茵媺跑贏同屆港姐3年抱3繼續做港姐之冠

陳茵媺跑贏同屆港姐
3年抱3繼續做港姐之冠

曾瑞珊係06年落選港姐,同屆冠軍陳茵媺、亞軍呂慧儀及季軍周家蔚都已成為人妻兼做咗媽咪,當中以陳茵媺最生得,三年抱三繼續跑出成為「冠軍」,大仔陳梓燁(Aiden Joshua)今年3歲,二仔陳浩鋒(Nathan Lucas)今年2歲,小公主陳凱婷(Camilla)剛啱1歲。

阿珊笑話﹕「係呀,我哋嗰年好生得,亦都嫁得好好。我哋有固定一班經常有聚會,差唔多一星期一次,感情幾好。」原來周家蔚係阿珊囝囝小龍嘅契媽,阿珊解釋﹕「因為家蔚同我個仔同月同日出世,大家都係8月25日,我哋隔日就傾電話,佢仲成日揸車嚟我度添。」

曾瑞珊參選完港姐後,簽約成為無綫旗下藝人,多數主持無綫收費台嘅飲食節目,亦有拍過劇集,並曾在《師奶股神》以泳裝亮相。不過,阿珊喺2010年決意離開無綫,佢話﹕「我好鍾意演戲,但去到一個位知道係咁上下,覺得唔可以再行落去,咁啱認識現時老公,機緣巧合下就離開娛樂圈嫁人。」