中國首名太空人楊利偉2003年10月底訪港，教育局長政治助理施俊輝（Jeff）一生難忘，因為佢以學生身份獲邀出席楊利偉某活動，「之後嗰日我要去考升學試」，最終喺美國史丹福大學先後獲數學學士及統計學碩士學位，在美留學時更開檔畀同學問功課。
Jeff有個細4歲嘅妹妹，直認由細到大較靜較斯文。讀民生書院小六時獲學校推薦參加校際數學比賽，仲俾當年嘅教育署等機構挑選培訓，代表香港到天津及日本等地作賽。升讀九龍華仁書院後如常愛數理，甚至做埋「數理學會」主席。
有啲嘢一世抹唔甩，例如名字前嘅「會考十優狀元」，「唉，其實呢件事我唔想講啦，30幾歲人仲要講會考」；畢竟係2003年嘅事，而佢今年31歲。若非加入匯賢智庫，相信冇人知佢係當屆狀元。攞獎學金到美國史丹福讀書嘅佢，原來從冇諗過負笈海外，有師兄探問有冇興趣留學先至驚醒夢中人，結果8月放榜，佢11、12月先申請負笈，難怪臨急先考升學試。
鍾意教書多啲
大學讀數嘅佢，話鍾意教書多啲，就連住大學宿舍都做過導師，「每周有辦公時間，喺canteen開張枱『睇症』，幫人解答啲數學、經濟、統計等難題」。畢業返港後都教過兩年書，同學生打成一片！