讀者們一向關心信用卡優惠，尤其近年銀行頻頻推迎新優惠吸客，打開銀包一張卡儲哩數、一張卡去旅行簽外幣、一張卡入Lounge，開卡賺優惠已是常識吧。雖然去到「達人級數」手持30張卡亦是等閒事，但正如子華神所言：「卡唔使多，一張又如何？」普通人手執5張信用卡，可能已經頂晒磅。
自從2003年爆發沙士後，本港經濟大致又經歷一個興衰起跌的周期，翻查金管局數據，2004年全港只有不足1,000萬張信用卡，但數字一直保持增長，即使2008年曾引發金融海嘯，本港信用卡數目亦不跌反升，一直升足12年至2015年高峰期的1,710萬張。不過，升勢直到去年底離奇「斷纜」，回落至1,660萬張，兼錄得較明顯的2.9%按年跌幅。
1,660萬張卡是甚麼概念？信用卡理論上限有穩定工作客戶申請，若粗略以最近13年的本港勞動人口數字計算，自2004年起人均持卡量由2.6張，一直穩步上升至2014及2015年的4.4張，直到去年回落至4.2張，始終未能突破一手揸超過5張卡的關口。
若非本港經濟突然明顯轉差或人口結構大幅改變，信用卡數目下跌或多或少已反映市場漸見飽和，再加上去年銀行實施新例，發卡後18個月內都沒有動用的信用卡，將會被自動cut卡，淘汰了一堆已被人遺忘的信用卡。
此外，雖然開卡賺迎新優惠不難，但除非卡戶其後願意真金白銀付年費，否則長期持有5張常用信用卡亦非易事。不少卡戶一見首年優惠已過，往往會因為要繳付年費而主動cut卡，若然銀行堅持唔waive，莫說年費要逾千蚊一年，即使只是100蚊，相信大部份卡戶都會即cut，反正多等一年又將再次變回新客申請，繼續賺迎新優惠，大概一手5張卡已是一個循環。
記者：陳洛嘉