李國寶最近獲東亞銀行（023）董事會延長行政總裁任期3年，起碼做到2021年，不過該行元老、昔日寶哥哥左右手──東亞高級顧問陳棋昌，據聞踏入70歲，本月底將正式全退，唔再擔任顧問一職，決定享清福環遊世界，近日佢就忙於出席farewell飯局。
紅褲仔出身嘅「昌哥」，19歲入職東亞工作，同東亞已有51年賓主關係，所以即使全退，佢都樂意幫手，續任東亞（中國）副董事長呢個非執行職位，之不過以後佢就唔會每朝7點正，出現喺東亞21樓辦公室咁解。
2007年已經「登陸」嘅陳棋昌，首次退下火線，卸任該行執行董事兼副行政總裁，經李國寶盡力挽留後，轉任高級顧問同東亞（中國）副舵手，當年股東大會上，寶哥哥仲向佢致送百達翡麗名錶作答謝，可見佢老人家地位非凡。
至於東亞另一位老臣子、前執行董事兼副行政總裁彭玉榮，仲有資深銀行家陳子政，就會繼續擔任東亞高級顧問。