喺經典電影《國產淩淩漆》入面，羅家英飾演嘅達聞西同司令有番有趣嘅對話，聞西話佢喺中央精神病院做緊研究，司令問佢做乜研究，聞西就話被人研究。堂堂曼聯前鋒、被中國同香港球迷稱為「呂布」嘅伊巴謙莫域，將來都會步聞西嘅後塵，被人研究。瑞典報章話，幫伊巴做手術嘅港產名醫傅浩強覺得，伊巴嘅膝頭天賦異稟，好值得研究。
瑞典報章《Expressen》引述伊巴經理人拉奧拿所講，伊巴主診醫生傅浩強同埋Volker Musahl幫佢手術嗰陣，係非常震驚，係佢哋從醫咁耐都未見過。佢哋話伊巴嘅膝頭唔似係屬於一個踢咗20年波嘅球員，簡直係同新一樣。兩位醫生想伊巴喺掛靴之後可以返嚟治療中心，俾佢哋研究一吓，睇嚟伊巴都好樂意。傅浩強同埋Volker Musahl係診治膝傷同韌帶嘅權威，佢哋除咗醫人，仲不斷做研究，精進醫術。
曼聯前鋒伊巴謙莫域膝部十字韌帶撕裂，前排去咗美國搵港產名醫傅浩強做手術，手術成功，但應該到下年先至復出。英國《太陽報》派咗記者去美國，上周六影到伊巴手術後去行街嘅相。見到35歲嘅伊巴兩隻手都要撐住拐杖，行得有啲辛苦，受傷嘅右邊腳成隻都包住白色嘅繃帶，仲有黑色嘅保護帶。佢上車嗰陣，都要先轉身企，坐落車入面，再慢慢收拐杖。
伊巴喺上月對安德列治場歐霸盃受傷，今季收「咧」。佢同曼聯今夏約滿，有傳佢唔會同曼聯續約，但曼聯會開放訓練設施畀伊巴用，領隊摩連奴仲話，如果曼聯喺歐霸盃拎到冠軍，實搵伊巴去捧盃。