「欄友」高C9上星期話企業開Facebook要講勇氣，說的一點不假，to be or not to be，諗清楚先去馬，冇能力、冇資源、冇眼界、冇胸襟，免問，一開咗就係不歸路，唔通開開吓又關閉帳號咁瘀咩。
是的，網絡是很危險的，網民是很殘酷的，而且快速，而且去得好盡，自問面皮薄、玻璃心，就無謂自找煩惱。要有心理準備，有時未必自己錯晒，甚至有時道理其實在自己一邊，也會有各式各樣的無妄之災從天而降，總之，有理說不清不是罕見的事。
美國一個叫Cracker Barrel的飲食集團，就畀一個Facebook post玩死。話說CB印第安納州某分店，有位服務了11年的員工被解僱，不知是否事發日剛巧在她丈夫Bradley的生日，為夫那位特別唔好老脾，在CB的臉書兜口兜面問：做乜炒咗我老婆？
咁都未使死，最弊呢個post畀有200萬粉絲的名人Amiri King跟進了，從此#justiceforbradswife一發不可收拾，成千上萬的網民留言聲援，直至今天，無論CB在臉書推甚麼宣傳，留言一定不停糾纏在事件上，譬如佢推炒蛋白餐，網民就會叫佢記住將蛋黃留起，送畀Brad老婆，因為佢已經冇錢食早餐......。
大抵冇乜人知事件到底邊個啱邊個唔啱，但CB最錯係個幾月來的鴕鳥策略，以為唔表態、唔回應，事件會沉底die down，明顯計錯晒數。專家呢個時候就獻計：最正路就出個大路聲明，遲就遲咗，起碼等人知道你未盲未聾囉；玩嘢啲，叫全國同事一人揸塊寫住「我係John老婆」、「我係Nancy個仔」之類嘅紙牌，順便搵個周末請所有自稱Brad老婆的客人食甜品；再玩嘢啲，請番真．Brad 老婆返來做代言人......
無論點，都唔係借咗聾耳陳隻耳。
彭瑪莉
mailto:[email protected]