唔少人因為鍾意信用卡卡面嘅公仔而特登走去申請，估唔到渣打香港連ATM卡都出呢招，仲一次過推出4款Iron Man ATM卡，開個儲蓄戶口已經可以拎到。
渣打同迪士尼一向係企業聯盟，噚日特登叫咗Iron Man去中環渣打大廈推新卡，不過Iron Man 影咗一陣相，就話要飛番去迪士尼開工，留低渣打香港個人金融業務主管江碧彤（Vicky）介紹新卡。
今次渣打張Marvel ATM卡有4款設計，望落都算幾型，至於點先開到? Vicky就話，其實新舊客戶只要開儲蓄戶口都可以換，學生哥如果夠16歲，已經可以開戶，基本戶口維持1萬蚊存款已經可以免年費，希望今年可以發出10萬張Iron Man ATM卡，吸多啲新客。