政圈盛傳林鄭心儀人選唔肯做政務司司長，令張建宗留任機會大增。向來係工作狂嘅肥張比以前更加博，噚日馬不停蹄，連走三場，中午出席報業公會新聞獎頒獎禮致辭時，自爆過去20年每日睇十幾份報紙，從無間斷，「所以我唔會放假，因為好難買到14張報紙，我放假都要四圍跑去買，因為啲報紙唔係間間都有」。
佢話喎，無論傳媒生態點變、科技點發達，獲取資訊渠道唔同咗，但客觀、準確、公正同持平嘅報道都係眾望所歸，認為好嘅新聞永遠都唔過時，重申香港係資訊自由流通嘅社會，《基本法》列明香港居民享有言論、新聞同出版自由，係香港成功嘅基石。