賭王何鴻燊三太陳婉珍同兩個女何超雲、何超蓮感情要好，佢哋日前就一齊去咗深灣遊艇會食飯。當晚大約7點幾，三太同超雲由淺水灣大宅坐車出發，同行仲有一名女助手，至於超蓮則獨自坐七人車匯合。超雲同超蓮打扮靚靚到場，尤其超雲身上嘅魚網衫真係好搶鏡吸睛。
兩架車幾乎同時抵達，三太落車後，有一名推BB車女子上前熱情揮手，相信佢哋係熟朋友，三母女同帶住BB嘅友人停步打招呼，索爆超雲對嬰兒手推車內嘅BB最有興趣，立即俯身撩BB玩。
群星到賀
傾完一輪後，三太女助手幫手托起BB車上樓梯，三太同兩個女就跟隨其後，佢哋一行人入到遊艇會大堂，繼續傾唔停，行到等電梯都未停口，睇嚟係好耐冇見咁，之後仲齊齊搭電梯上樓食飯。
超蓮同龍鳳胎細佬何猷啟今日26歲生日，前晚蔡卓妍、鍾欣潼、鄭希怡、丁子高、JW同吳千語等就搶先同超蓮搞生日P喪劈，JW噚日喺Ig貼派對相後大讚超蓮，JW仲唔避嫌帶埋有米男友Tarzan到賀。丁子高噚日都喺Ig貼畀女圍合照。
撰文：馮仁昭
