【本報訊】家長為小朋友選購新毛公仔，子女愛不釋手，但要小心誘發眼敏感症狀。眼科醫生指出，不時接獲兒童因眼痕等眼敏感不適求診，近期轉季更特別多，雖然床單、珊瑚絨毛氈藏着的塵蟎是常見致敏原，但亦有小朋友在嘉年華玩遊戲贏取毛公仔後，疑因無用熱水先清洗滅蟎，晚上與毛公仔同睡，致眼敏感發作，更因眼痕嚴重「捽花」眼角膜。
記者：梁麗兒
眼科專科醫生劉凱珊指，眼敏感即敏感性結膜炎，屬敏感症之一，由致敏原引起，令眼睛的最表層，即結膜出現過敏反應。由於兒童的免疫系統較強，較易有敏感反應，相對中年或老年人，較容易受眼敏感困擾。求診病人以3至7歲兒童為主。
眼睛痕癢、眼白因為血管擴張變紅或粉紅、眼有分泌物或部份眼白凸起，均是眼敏感症狀。最常引起兒童眼敏感的元凶為塵蟎，例如被套床單、枕頭袋、窗簾、地毯、毛公仔等都是塵蟎溫床。其他常見致敏原包括污濁空氣，在空氣污染指數高的日子，眼敏感也較易發作。另外，亦有兒童對蠟筆、泥膠敏感，例如使用蠟筆後，沒有洗手就捽眼致病發。
要改善眼敏感不適，劉指，最重要是追查及避開致敏原，「有時家長會醒起仔女朝早起身發作明顯，離開屋企返學就好啲，就要諗吓係咪睡房有塵蟎致敏，好似新買嘅毛公仔或者珊瑚絨毛氈，都可能係塵蟎積聚溫床」。她建議家長勤用熱水清洗床品，以60℃或以上高溫水滅蟎，最好一星期洗兩次。另外每周用熱水洗窗簾布，避免用珊瑚絨毛氈或先用被套蓋上。
可引致散光角膜炎
劉指，去年曾接獲數名求診兒童，疑因玩在嘉年華中贏取的毛公仔，接觸到塵蟎致眼敏感發作，其中一名約5歲男童，感到雙眼痕癢，「睇嘢有少少矇」，由家長帶往求醫，原來男童症狀已持續近一個月，雙眼痕癢令他要不停捽眼，常遭母親責罵，檢查發現男童患眼敏感，更因經常捽眼致雙眼的角膜被「捽花」。當細問病發經過，母親憶起兒子發作前曾在嘉年華遊戲中贏取一個毛公仔，「之後晚晚攬住瞓」，懷疑是致敏原。男童使用藥物治療，紓緩眼痕症狀及滋潤雙眼後，同時避免接觸毛公仔，病情才改善。
家長日常應要定期用熱水清洗毛公仔，尤其新買時，更盡量避免在睡房擺放太多毛公仔，宜放在客廳，切忌攬公仔睡覺。劉稱，眼敏感會令小朋友不停捽眼，有機會導致有散光問題。另外，眼敏感嚴重也可造成角膜炎，影響視力，不容忽視。
想輕輕鬆鬆健康啲，記住留意健康蘋台
http://health.appledaily.com.hk/