天星小輪應該係過海最便宜嘅工具，從中環去尖沙嘴，上層票價只係兩個半，下層就兩蚊。票價夠便宜之外，乘客亦不多，永遠有位坐，坐在上層過海，有維港兩岸海景可睇，兼且涼風習習，勝過下午六時半在中環逼地鐵去尖沙嘴多多聲。
每逢黃昏有約在尖沙嘴廣東道一帶，左丁山就盡量搭天星小輪，唔去人多恐怖嘅地鐵鬥逼，但不少朋友都唔制，主要原因就係即使由最近嘅置地廣場行過去，點都要行十分鐘，長者及行動不便人士視若畏途，年青男女就覺得太慢，嘥時間。因維港填海，將天星由大會堂前搬到現址，對天星小輪係一個大打擊。
遙想當年每早自尖沙嘴火車站行出嚟，人群全部湧往天星碼頭，入閘要分三次潮水式先至上到船，到黃昏收工去搭火車返屋企，中環天星碼頭亦實行潮水式入閘。當時係天星小輪黃金時代，屬怡和旗下九龍倉所有，不少管理員係身穿海軍藍制服嘅英國人，英姿勃勃。到了今天，天星小輪屬吳光正旗下九龍倉集團，英俊英國管理員不見了，碼頭內人也不多見一個，管理員皆似等退休的，沒朝氣的老人。如果講甚麼集體回憶，歷史回憶，左丁山對中環街市、皇后碼頭、政府西翼皆無記憶可言，拆之不覺可惜，唯獨是天星小輪（唔係碼頭）係左丁山嘅最大回憶。天星小輪在維港亦是香港icon，聞名世界，1966年天星小輪因加價斗零而導致蘇守忠靜坐，盧麒示威，釀成一場九龍騷動，左丁山記憶猶新，暴動之夜，左丁山在旺角彌敦道嘅同學居所刨書應付會考，在二樓窗口目睹遊行示威，想忘記都幾難。
51年後，天星小輪經營唔駛問都係相當辛苦嘅嘞，中環至尖沙嘴航線每日只有3萬9千人，每人收2.5元，一日都係得97500元，一年係3千5百萬元咁上下，（下層只收2元一程），點會賺到好利潤吖，左丁山其實好驚吳光正突然間講不再注資天星呢類說話，有線有政治作用，因而有人垂涎，但如果天星小輪熄火，唔通有慈善團體去買咩！左丁山好贊成天星加價，由2.5元加到3元，好平常啫，香港人今天邊度會介意五毫子，正是跌落地都冇人執，況且以左丁山所見，每日搭天星小輪者，講普通話、日文、韓文、英文、法文者甚多，政府講香港市民難以負擔之類，離地到暈，票價加到3.5元，亦算OK，當係拯救及永續保存天星小輪啫。