俄羅斯球手舒拉寶娃自從坐完15個月「禁藥監」後繼續復出征途，繼早前斯圖加特網賽4強出局後，嚟緊又會參與馬德里網賽。賽會周四方面先舉辦「Tie Break Tens」畀各位球員熱吓身，但真正熱話落咗喺場外，皆因賽會安排所有參賽球手坐埋同一個包廂等候出場，結果舒娃同2015年甩拖嘅前度、保加利亞網球手狄美托夫就被迫相遇！雖然當年甩拖原因眾說紛紜，有指狄美偷嗒《花花公子》女郎，亦有指雙方地位不平等先係導火線，但鏡頭影到佢哋喺場邊咬耳仔，氣氛少少老尷咁囉。不過，舒娃早前受訪都話舊年已經同狄美喺紐約重逢，睇嚟再見亦是朋友嘅。
講番呢個「Tie Break Tens」賽事係第3次舉辦，男、女子組各有8位球手參賽，對賽雙方只有一分鐘熱身時間，然後就埋牙鬥快攞10分，如果打成9:9就要繼續tie break落去直至贏對手兩分為止，所以每一分都不能少！單計場上表現，舒娃就失色好多，首圈就以6:10輸畀里奧金牌得主佩芝，狄美就一路殺入決賽，仲以10:7擊敗F盧比斯奪標！女子組就由羅馬尼亞嘅哈蕾普封后。