英超呢個禮拜嘅重頭戲當然係阿仙奴喺禮拜日主場鬥曼聯，無論係「兵魔戰」抑或係「魔兵戰」都好，年年英超都梗有兩場，如果喺其他比賽碰頭，就唔止踢兩場添！不過，禮拜日呢場波原來堅特別，直頭係40年嚟第一次，真係唔講得笑！
英國《天空體育》報道，今次阿仙奴對曼聯，係兩隊40年嚟第一次喺下半季嘅對賽，咁啱兩隊同時都唔係排喺聯賽榜前四位，對上一次有咁嘅情況，已經係1977年，認真唔係一個值得驕傲嘅紀錄。
喺1977年嘅5月14日，紅魔鬼當時排第6，阿仙奴就排第7，果場波曼聯最後贏3:2。同一季，曼聯最後喺英格蘭足總盃決賽贏利物浦2:1捧盃。喺1977年果陣，現任曼聯領隊摩連奴只係得14歲，至於依家嘅兵工廠領隊雲格果陣就係27歲，仲踢緊 ASPV Strasbourg，如果計兩隊依家嘅球員，更加係無一個人已經出世。