建制派立法會議員噚晚喺灣仔皇朝會，宴請即將卸任特首嘅689，特首辦主任邱騰華、特首辦特別助理邱萍菲亦有份食。43名議員中，有18人缺席，只有25名建制派議員畀面出席，除咗梁粉民記周浩鼎遲近10分鐘先到，現時住喺皇朝會附近候任特首林鄭，亦咁啱喺飯局開始無耐，喺正皇朝會外上車離開，畀傳媒拍下自己嘅「不在場」證據。
至於一向係忠實梁粉嘅民記「元秋」蔣麗芸，噚晚就冇去呢個飯局，佢話呢啲食飯佢唔去，話自己淨係做嘢先會去，另一民記議員何俊賢亦話要主禮青山三洲媽天后寶誕活動唔去，仲反問八方天后大啲，定特首大啲？根據與會者提供資料，建制派「班長」廖長江同民記主席「琼子」坐喺689左右手，菜式有9道菜，入面冇涼瓜、甜品亦冇涼粉食，但有皇棗糕同脆波波。