啱啱獲委任做候任特首辦主任嘅陳國基，前日就俾《蘋果》搵到佢老婆黎展霞原來係將軍澳張沛松紀念中學校長；而陳國基早幾年做入境處處長嗰陣，原來除咗佢自己、入境處其他高層都成日出席學校活動做嘉賓。
咁啱得咁蹺，去過學校嗰3個高層後來都升晒職做助理處長。八方今日又再去學校網頁睇下，點知啲活動相已經俾人刪走晒。
數番嗰幾位升職高層，其中時任入境事務學院校長陳天賜就喺2013年出席過學校田徑運動會；兩年後同一個活動，學校又請到另一個時任入境事務學院校長何家榮到場頒獎。至於學校去年舉辦嘅「青少年科藝嘉年華」，更獲入境事務處樂隊到場演奏，時任首席入境事務主任區嘉宏都有出席。我哋噚日都有問過候任特首辦同埋張沛松紀念中學，不過到截稿都冇人回覆。