特首政府為搞慶回歸活動被揭狂嘥公帑後，嚟緊又計劃喺中西區搞個極度擾民活動，破天荒喺7月2日早上6點至午夜12點封咗成條荷里活道，去搞個慶回歸活動！有當區民主派議員同八方講，呢個由發展局力推嘅「文物時尚」活動，計劃當日近乎全日封咗荷里活道，邀請唔同團體擺設38個攤位，預計吸引2至3萬人到場。
由於呢個活動舉行地點，有民居、醫院、學校等，所以影響好多居民，事先要通知700幾個業主立案法團，至少4條巴士線要改道，居民當日要行多十幾分鐘至可搭巴士，亦可能影響到醫院覆診嘅巿民。據知所屬選區受影響嘅4個民主派區議員已極力反對，希望政府可考慮改到電車路搞，可惜政府似乎唔多理，有可能無視反對聲音照搞。