七警案判罪後，建制派成日要求立「辱警罪」保障警員執法，梁美芬噚日終於同張國鈞及何君堯出嚟交代，4月初以私人條例修訂方式向律政司提交辱警罪草案，話要保護來自警署、廉署、懲教署、入境處及海關嘅執法人員。
草案提出「17H 侮辱執法人員罪」，重犯要坐監1年及罰款5千。何君堯話，「17H」係本港新產品，但𠵱家唔少國家已有類似條例，香港應追上國際形勢喎。
梁美芬好坦白話，私人條例修訂好難做到，需要「過四關」包括得到律政司確認、交畀立法會、經議員分組點票、最後要獲特首支持。其實保安局局長黎棟國上個月已經講過，政府現階段未有計劃立法喎；非建制派亦比建制派多一席，葉劉淑儀已講過唔支持，梁美芬可能要游說非建制議員支持，但民主黨已率先話唔撐，唔知梁美芬點算好呢？