社民連主席吳文遠噚日喺東區法院氹氹轉，事關佢涉嫌上年立法會選舉投票日向梁特掟臭魚治，但掟中佢後面位警員，被控普通襲擊，同佢舊年11月佔領西環單案，咁啱同一日分上下晝提堂。吳話都係拜梁振英所賜，準備申請傳召梁振英喺臭魚治案中做證人，「唔好等佢政治檢控得咁過癮」。
雖然控罪係話吳襲擊一位署理總督察而唔係梁特，但吳決定要傳召梁振英，佢喺庭外強調當日嘅示威對象係梁，唔係佢後面嗰位警員，7月1日卸任後再無藉口拒絕上庭，呼籲梁生唔好做縮頭烏龜，要為自己行為負責咁話。
講番單掟臭魚治案，其實裁判官同控方都知吳想傳召梁做辯方證人，但得意在庭上冇人提過梁特個名，大狀只係話「嗰位證人」7月1日後身份會唔同咗，相信會容易啲傳召。單案定喺7月19日開審。