90年代樂壇四大天王劉德華、黎明、郭富城同張學友，莫講話迷死不少青春少艾，就連好多男生都好傾慕佢哋啦！
最近馬圈喺短途、一哩、中距離同長途呢四個路程範疇，就出現新四大天王，講緊嘅係四匹明星馬「紅衣醒神」（蔡約翰馬房）、「佳龍駒」（大摩馬房）、「巴基之星」（告東尼馬房）同「鷹雄」（大摩馬房）。
「紅衣醒神」近三仗全勝，被喻為新晉短途王，佢似足城城咁周身muscle，呢匹馬今季六戰獲四冠一季一殿，已經成為128分全港最高分馬。城城剛剛同女友拉埋天窗，紅光滿面，跳舞又醒神，直情同「紅衣醒神」夾到暈！
一哩王「佳龍駒」乃係應屆四歲馬三冠王，隻馬特點係晨課唔起眼，好似學友咁低調，但出賽一加速，爆起後勁上嚟真係唔講得笑！十足十學友咁，唱歌飆高音易過食生菜！
「巴基之星」就擅長中距離，喺女皇盃（一級賽2000米）得亞軍，連現任馬王「明月千里」都跑贏，佢到港初期脾氣唔係人咁品，有多少「邪邪哋」！不過越跑越進步後，已經「改邪歸正」！就好似當年王晶搵黎明拍《少年賭神》，就係因為貪黎明眼神有少少「邪邪哋」嘅味道！
至於「鷹雄」係澳洲昆士蘭打吡冠軍，在港亦剛剛贏出皇太后盃（三級賽2400米），大長途實力相當雄厚，所謂路遙知馬力，而劉華紅足30年，絕對係一匹娛樂圈大長途馬，佢同「鷹雄」真係可以互相輝映！