怪獸家長呢味嘢唔知香港有，遠至美國一樣大把，好似呢位「波叔」LaVar Ball就係表表者。話說波爾家族三兄弟一門三傑，個個打籃球都係咁好波，其中效力UCLA、19歲嘅朗素波爾（Lonzo Ball）雖然喺NCAA「瘋狂三月」16強止步，依然成為今年NBA選秀熱門人選。不過，波爾老竇早前就同美國3大品牌「一剔」、「三間」或者UA開價10億美元簽10年約，先肯畀朗素做代言人，否則一於繼續為自家品牌「Big Baller Brand」代言。喂，人哋勒邦占士（LeBron James）2003年同「一剔」簽處子合約，7年總值都係9,000萬美元咋喎，難怪三大品牌啋你都儍。
馬死落地行，朗素周四就發佈首對Big Baller Brand簽名球鞋，成為首位未選秀先擁有自家簽名鞋嘅球員，呢對ZO2盛惠495美元（約3,850港元），限量特別版仲要賣到995美元（約7,740港元），唔通真係能夠顛覆體育品牌巨頭壟斷……查實495美元有幾貴？即係你買完勒邦占士、杜蘭特同史堤芬居里3對最新波鞋，仲有50美元剩番咁囉。
不過，向來講嘢唔畀面嘅「巨無霸」奧尼爾（Shaquille O'Neal）就喺twitter大潑冷水，tag埋波爾咁話：「Hey波爾，真正嘅big baller brand唔會敲詐細路一筆囉。」的確，奧尼爾推出嘅籃球鞋Shaq Shoes喺當地超市可以平到16美元（約125港元）一對，同呢對ZO2差天共地，又的確寸得起嘅。