曼聯喺周四歐霸盃4強首回合作客贏切爾達1:0，躋身歐霸決賽機會壓一，但領隊摩連奴一向挑剔或曰對球員要求高，尤其是米希達利恩同連格上半場都錯過黃金機會，摩佬賽後受訪時依然表示對戰果唔多滿意：「我滿意球員表現，但唔多滿意戰果。我哋半場早就應該……唔好話領先3球，但有兩球啦。目前嘅比數仍然充滿懸念，下周喺奧脫福會係一場硬仗。」
至於妙射罰球一箭定江山嘅拉舒福特，尾段被換出疑似有微傷導致只能慢步離場，摩佬對呢位新星不吝讚美之詞，亦透露福仔頂住微傷紮住上：「福仔係一位熱愛足球嘅19歲小伙子，每次操練完結後都會花多半粒鐘練習罰球，然後等待機會。佢努力得嚟亦好成熟，重要嘅唔係年齡而係質素。佢喺賽前已經有微傷，明顯喺跑動時亦感受到痛楚。」有英國傳媒報道指，福仔同尾段入替冇耐後傷出嘅艾舒利楊格，有待檢查傷勢先知道嚟緊周日聯賽作客阿仙奴能否上陣。