39歲、第100場歐聯上陣、連續6場歐聯清白身、621分鐘歐聯不失球……連串數字在在說明39歲祖雲達斯門將保方繼續保住後方有幾神奇！周三歐聯4強首回合，保方全場作出5次撲救，其中上半場擋出摩納哥「新亨利」基利安麥巴比嘅近射，以及完場前單手托出基歷克勁頂至為關鍵，協助祖記力保清白身淨勝2:0，對上一次歐聯失波已經係舊年11月分組賽俾西維爾嘅巴里查射破，之後分組賽對薩格勒布戴拿模、16強兩對波圖、8強兩遇巴塞隆拿，以至今場對摩納哥一樣冇失波，有統計更指佢已經連續69次面對對手射門而保持不失，認真誇張！
保方賽後表示：「每場波我都想證明，自己到咗呢個年紀依然值得喺呢個水平嘅賽事披甲。他朝一日當我離開球壇，我希望人們會為此感到難過。」唔使等到退休，相信好多中立球迷都希望呢位意大利老牌門神，經歷22年職業生涯後能夠首度染指歐聯錦標！