吳卓羲、蔡瀚億（BabyJohn）、姜皓文前晚喺尖沙嘴出席電影《拆彈專家》慶功宴，香港票房截至前日已經有1,922萬元，連同中台等地票房，已收超過3億1千萬元。身兼演員、監製職位嘅劉德華，雖然仲養緊傷，但依然透過電話同在場人士打招呼，主持打開電話嘅speaker之後，華仔話：「我係劉德華，大家好。所有嘅兄弟姊妹多謝晒。台前幕後嘅手足，亦都花咗好多時間去幫我宣傳，仲有導演，我第時就會雙倍奉還。我最開心係勞動完之後，大家有咁開心嘅成果。哎吔！我都唔識點講喇，總之多謝所有入場嘅觀眾啦，同埋恭喜導演同手足，我哋開第二集啦。」令到全場人士歡呼。
謝票怕俾人飛鞋
今次重點替華仔宣傳嘅吳卓羲，佢話去咗內地7日走咗6個城市，仲話最抵死嘅一場謝票，係放到一半停機，入場同觀眾打招呼，佢話：「我好驚俾人飛鞋，因為播到一半好緊張，不過好彩係司儀行入去先，最後都冇事。」BabyJohn話因為戲中角色多咗個花名叫「催淚漢」，BabyJohn話：「嗰幕好催淚，我睇首映時係第一次睇，因為好緊張自己嘅表現冇喊，但第二次入場睇真係爆喊，同埋好開心，見到戲院一地都係紙巾，真係睇到場都濕晒，我真係好變態，見到人喊好開心。」不過呢一集華仔已經炸死咗，至於續集佢用乜嘢方法登場就冇人知嘞。
撰文：馮仁昭