大台播緊嘅《不懂撒嬌的女人》入面拍住林文龍做兩大男主角之一嘅王浩信，近年被受大台力捧，有唔少劇都再到佢嘅演出，不過其實佢出道嘅時候並唔係演戲，而係唱歌！
王浩信出道前做過平面設計師，因為唱K而被發掘簽約做歌手，05年簽唱片公司，翌年仲出埋碟，不過佢嘅歌唱事業好明顯唔係好順利，同唱片公司簽咗3年約，約滿後轉投埋大台，而佢第一套演出嘅就係劇集就係《野蠻奶奶大戰戈師奶》，及後王浩信喺大台磨練多年，其中喺《名媛望族》中畀劉松仁連摑十幾巴令人非常難忘。
而真正開始上位嘅就係2013年拎咗「飛躍進步男藝員」，而喺2015年佢仲首嚐男主角滋味，喺《樓奴》飾演樓耀明。而王浩信喺去年算得上係佢嘅豐收之年，佢仲憑《EU超時任務》入面嘅關鼎名（渠頭）有機會問鼎視帝，雖然最後都不敵《城寨英雄》嘅陳展鵬，不過王浩信喺劇中演出令人眼前一亮，雖然早喺2011年已經同陳自瑤結婚，早已升呢做人夫，不過王浩信情深嘅演技，令佢同拍檔千雪BB成為去年嘅「最喜愛TVB熒幕情侶」，而佢喺結局嘅一段獨白仲成為網民熱話！