一大班「藍絲」包括屈穎妍、雷鼎鳴、潘麗瓊等人推出名為《我們是香港真本土》新書，噚日仲隆重其事舉行發佈會，獲邀撰文嘅民主思路發言人湯家驊就話主辦單位搵佢寫文時，只係叫佢講吓本土情懷，坦言對書名「有些少意見，唔太認同標籤」，話覺得本土冇真假，最重要講感受。另一作者、教育評議會主席何漢權會上亦話：「其實我唔係真本土，我喺澳門大。」透露爸爸當年因經營飯店失敗先「着草」來港開大牌檔。
至於一班藍絲作者又有乜偉論？屈穎妍話書名令佢喺網上不斷俾人鬧，但鬧極都有粉絲到場，包括曾經因為受賄案判囚嘅陳奕迅老竇陳裘大。現年72歲嘅陳裘大席間主動舉手發言，大鬧所謂本土只係用嚟反共；八方會後問過佢，佢自稱係「屈穎妍粉絲」，專誠嚟捧場。