雖然候任特首林鄭月娥噚日回應記者提問時話，對於有傳中國國家主席習近平今年七一，來港至今未有消息公佈，但適逢特區回歸20周年兼新一屆班子上任，習大大稍後訪港幾乎係鐵一般事實，政圈仲熱傳佢嘅夫人彭麗媛極大機會隨行，或會喺唔少活動亮相。
八方聽聞，觀乎林鄭當選後冇乜大錯、民望又開始回升，北京初步評估今年七一上街人數唔會再爆燈，始終冇咗CY，市民心情都唔同咗。而喺呢個時候，軟銷都幾重要，唔少政圈中人就被問及，如果彭麗媛以中國第一夫人身份陪同到訪，會唔會都有啲紓緩怨氣嘅效果？仲深信佢到訪時嘅衣着配搭，都會成為市民茶餘飯後討論焦點，肯定又可轉移視線。
既然咁有戰略作用，加上今年七一係香港大日子，據知彭麗媛陪同來港機會高唱入雲，甚至有啲團體都籌備緊活動，畀呢位第一夫人參加同市民接觸。外界當然好關注，呢位歌后會唔會喺訪港期間開金口？事實上佢近年已經鮮有公開表演，如果再為香港開腔，帶出嘅政治意味肯定大過歌曲本身咯。