慘情係劇集常見題材，港台韓劇更為常見，以為慘情劇只係為咗吸觀眾谷收視，推到沒有最慘只有更慘？唔一定嘅，有時劇本寫得好，hit中觀眾層，唔止有捧場客，仲可以成為話題。
近少少嘅好似龔嘉欣咁，佢喺《幕後玩家》中，做黃宗澤（Bosco）老婆，但因為Bosco搭上「小三」劉佩玥，龔嘉欣已經勁傷心，點知Bosco仲絕到逼佢離婚，令已有產後抑鬱症嘅佢，再受大打擊，令其抑鬱症復發，Bosco仲話要搶番個女，令龔嘉欣癲上加癲，嗰場喊戲睇到好多觀眾心都噏埋。而龔嘉欣最後憑呢套劇喺舊年嘅《萬千星輝頒獎典禮》中奪得最佳女配角。
呢一套棄婦題材hit到爆嘅，係1994年播出嘅《再見亦是老婆》，由陳秀雯、姜大偉同鄧萃雯等主演，故事講述已婚婦人陳秀雯為咗照顧家庭，忽略自己外表，不修邊幅。另一邊廂，佢老公姜大偉遇上女星周嘉玲，共墮愛河，更拋棄家庭，陳秀雯頓失所依，幸好喺好友鄧萃雯同林偉改造下，振作起嚟，仲由肥師奶變得美麗熟女，姜大偉後來更重新追求陳秀雯，挽回夫妻感情。
而喺《女人最痛》中，飾演「Cash太」嘅米雪喺公司身居要職，奈何因工作壓力同兩次小產之痛，令佢一直未有所出，更遭奶奶詬病，雖然佢最後肯冒高齡產婦之險懷孕，卻發現老公一直在外偷食，離婚後更決心做單親媽媽養大骨肉。點知BB出生後，老公就嚟爭撫養權，令佢慘上加慘，腹背受敵。
除咗棄婦劇情夠催淚，仲有賤男呃女都好啱觀眾口味！好似今年初先播完嘅《乘勝追擊》咁，焦點之一係飾演賤男嘅陳山聰，連食莊思敏同傅嘉莉，床戰場場激烈，睇到觀眾肉緊之餘，仲戥被視為替代品嘅傅嘉莉勁唔抵。