禮賓府首位女主人、候任特首林鄭月娥噚日終於公佈「大內總管」人選，一如所料由前入境事務處處長陳國基獲任，外界預料陳之後都可以過渡至新政府。人稱KK多過英文名Eric嘅陳國基，可能因為過往獨沽一味專責出入境事宜，唔算喺公眾前多亮相，但喺政圈卻廣結人緣，同建制及民主派都有好關係，據知KK酒量勁，經常以酒會友，可能回歸後駐京嗰三年，練到一身好酒量？
有政圈中人話，KK三年駐京生涯可算仕途轉捩點，佢係特區首批派到駐京辦嘅政府人員，1998年已經喺北京臨時辦公室做嘢。佢曾經接受《文匯報》訪問暢談駐京生涯，自爆初期普通話屬「煲冬瓜」水平，其後報讀清華大學嘅國家法律課程，寓學普通話於了解國家，明言課程令佢加深對國家制度嘅認識，亦建立咗人際網絡。
眾所周知，喺內地交際應酬，唔飲番幾杯都好難甩身，唔知KK係咪因此練到變成酒筲箕？但八方聽過幾位同佢開懷暢飲嘅人，一致話佢酒量勁，笑指好啱擔任要同各界溝通嘅大內總管，最好多啲同泛民飲酒，等大家飲多兩杯放鬆時談吓心。
前上司葉劉：我都好勁
曾任KK上司嘅葉劉淑儀都話對方酒量唔錯㗎，仲笑指：「我都好勁，不過係當年，𠵱家係長者要少飲啲。」
除咗酒量好，KK仲有認錯嘅膽量。民建聯副主席陳克勤憶述，曾經因為處理雙程證孕婦來港錯誤被拘留嘅個案，獲時任入境處副處長嘅KK親自來電耍冧，「佢話入境處係犯咗錯，所以親自打電話嚟道歉，亦向被拘扣留嘅人致歉」。
堂堂副處長肯say sorry，陳克勤都受寵若驚，大讚對方勇於為部門錯失承擔責任，兼肯同議員溝通，相信佢勝任新職，「因為要同唔同黨派傾，交際手腕好需要」。
李八方