兩屆F1世界冠軍、35歲麥拿侖車手艾朗素開季到而家瘋狂抱怨車隊嘅本田引擎完全fail，搞到開季4站有3站未能完成賽事。不過，佢喺月尾連摩納哥站都唔玩，寧願代表麥拿侖出戰印第安納波利斯500大賽，總算可以散吓心。艾朗素周三就駕駛Andretti/McLaren Dallara DW12-Honda Indy戰車完成強制參加嘅「新人」測試，喺50圈內輕輕鬆鬆完成指定速度要求，仲試過造出每小時222.548英里嘅圈速，表現相當唔錯架！佢完成測試後表示：「到目前為止都係好好嘅體驗，但之後就嚟真啦。呢個係好有用嘅一日，令你了解呢個唔同嘅世界，同時體驗箇中嘅速度。仲有漫長嘅路要走，但我對第一步好滿意。」
不過，艾朗素喺測試末段無啦啦「殺生」就唔多老利，皆因佢架戰車嘅左、右前輪幾乎同時捲入兩隻喺車道上嘅雀仔，即時「血肉橫飛」，呢啲經驗相信唔係好好嗰部份啦。