海洋公園每年8月都會為大熊貓慶祝生日，適逢今年係公園開業40周年兼特區成立20周年，園方特別舉行大型party，屆時除咗首次展出一系列以大熊貓為主題嘅時裝，仲透過舉辦大熊貓T恤設計比賽，等大家齊齊變身滿fun熊貓。
年滿18歲嘅香港居民，可以設計以海洋公園、大熊貓或相關保育訊息為題嘅T恤，比賽評審會揀選24款最佳設計，除咗會喺8月初嘅慶祝派對登場，更會生產成T恤，每件T恤仲會有一張介紹活動概念兼簡介設計師嘅掛牌，喺園內禮品店及其他相關銷售點出售，為期6個月，部份收益會分別捐贈香港工業總會及海洋公園保育基金，推動創作兼支持大熊貓保育工作。冠軍設計原來會有港幣6,000蚊同樂園一年通行證，有興趣者可以喺5月31日前提交作品。