廠商會年底換屆，早前盛傳3個副會長徐炳光、吳宏斌同戴澤良都有意競逐會長。廠商會上次換屆，獲商會元老力撐嘅政協常委陳永棋堂妹陳淑玲慘遭滑鐵盧，由李秀恒爆冷勝出，據聞今屆會長之爭嘅激烈程度不相伯仲。
戴澤良早前話全力支持徐炳光，據知李秀恒都係同一陣營；而吳宏斌就獲逾半副會長如楊志雄、陳淑玲等支持，可謂勢均力敵。廠商會係由會董選出會長，而由會員選出嘅會董選舉則於11月初舉行，今屆會董數目由100個加至110個，有會董透露會員人數呢屆急升，相信兩大陣營落力拉人入會。
另有消息指李秀恒任會長後，屢用廠商會之名大手筆捐獻，令部份會董有微言，上屆撐李會長嘅票未必「過戶」畀徐。點樣大手筆法？據悉佢上任以來捐款近7,000萬，包括捐畀各大學3,000萬、慶回歸20周年活動2,000萬，撥款1,000萬元照顧來自一帶一路國家嘅學生住宿等。