回歸後，有「五一勞動節」假期，放假一天。五一勞動節係共產國際嘅產物，西方國家多不認同，所以直至到1997，香港都未有五一假期，依家就梗係要跟足北京指示啦。於是乎今個星期一唔駛返工，有時間讀吓雜誌，早上打開「創價學會」每月贈閱嘅「明報月刊」4月號，發覺呢期好有趣味性，特別係老友記鍾普洋所寫嘅：「經營管理第二課：香港的兩棲優勢」及金耀基校長之「再思大學之道」，值得一看再看。
以前收到贈閱就擺埋一邊，今次見到鍾普洋之「經營管理第二課」，急急去搵明報月刊3月號，一時之間搵唔到，老婆話：「抵你呢，你張書枱左右兩旁堆滿中英文雜誌、剪報及馬經，雜亂無章，咁容易搵到咩！」
搵唔到就慢慢等本雜誌出現（有時無心插柳就一搵即有）。明報月刊今期又有一篇大概係左丁山呢類人先會讀得有興趣嘅文章，就係中大職員熊景明女士所寫嘅「中國文人精神：陳克文中國近代史講座」。
左丁山認識前中文大學中國文化研究所所長陳方正教授已經有30餘年，當年奇怪點解呢位哈佛大學物理學博士會對中國文化咁有研究，但一直唔敢直接詢問，讀咗呢篇文章，方知佢家學淵源，係名門之後，怪不得也。原來陳克文先生（1898-1986）就係陳教授尊翁，據熊景明女士簡介，克文先生曾代表國民黨與毛澤東等人共同負責農民運動講習所，於1935至1949任職國民政府行政院，生前寫下十二冊日記，記述1937-1952年間之事跡，由陳教授編輯成書，余英時教授寫序，2013年由中央研究院近代史研究所出版。克文先生與汪精衛、蔣介石因有工作關係，與汪精衛往還甚密，對汪之出走投日，極為失望，憤怒，但戰後汪夫人陳璧君入獄，克文先生幾次探訪，送藥，不忘舊情。如此人物，1949年後選擇來港，可見其智慧，1952-1978年在聖保羅男女中學教中文與中史，實在是聖保羅男女之幸，當年學生有福了。如陶傑說過：1950年代，大批內地有識之士逃港避秦，為求養家放下身段，在本港學校教書，為香港教育界培養了大批優秀學生，如陳克文先生竟在中學教中文與歷史，其資歷及經驗遠非今天的中學教師可比，另一個例子當然是李柱銘父親任教於九龍華仁。回想起來，左丁山在私校讀書，中一至中三的中文老師姓陳，到現在也不知他的背景，但上課時，初中生也能感覺到他老人家的一股傲氣兼怒氣，上課時逼我們放棄「殖民地課本」，改讀古文評注，想來也是一位逃港文化人了。今日左丁山還懂得讀古文，皆拜陳老師之賜也。