騎士球星勒邦占士（LeBron James）勁得嚟都有唔少haters，東岸次圈打咗兩場波已經多兩項罪證，一樣係「寸」：Game 1搏到犯規後走去場邊觀眾度攞啤酒扮飲，Game 2又喺速龍前鋒伊巴卡（Sergi Ibaka）面對拋兩吓波先起手射3分命中；一樣係「小器」，皆因占士俾相關啤酒品牌過橋宣傳後揚言要狀告佢哋，仲翻舊賬話呢個品牌昔日借佢由騎士過檔熱火嚟抽水。不過，Haters幾多都好，占士喺周三Game 2交出39分、6籃板、4助攻、3偷球、2封阻嘅全能數據，加埋隊友K艾榮（Kyrie Irving）造出back-to-back「20+10」貢獻22分、11助攻，幫球隊以125:103擊敗速龍，場數領先2:0。
速龍教練奇斯（Dwane Casey）今場變陣，改以N鮑維（Norman Powell）同P柏德遜（Patrick Patterson）打正選，但首節面對騎士3分5投全中、高達70.6%嘅投射命中率毫無招架之力，即使華倫斯拿斯（Jonas Valanciunas）後備上陣攞到10分，依然落後22:34。之後就輪到LBJ破紀錄時間，先係第2節尚餘7分32秒時射入3分，成為繼阿倫（Ray Allen）、米拿（Reggie Miller）同真路比利（Manu Ginobili）後第4位累積季後賽射入300球3分嘅球員，到第3節再度得手後，更喺季後賽史上得分榜超越「天勾」渣巴（Kareem Abdul-Jabbar）嘅5,762分佔據第2位，目前以5,777分僅次於「籃球之神」米高佐敦（Michael Jordan）嘅5,987分。速龍打完3節已經落後26分，禍不單行係洛利（Kyle Lowry）扭傷左邊小腿，整個第4節都未有重返賽場，最終佢哋係另一主力迪洛桑（DeMar DeRozan）全場11投2中只得5分下慘負103:125。Game 3香港時間周六7:00am喺速龍主場上演。