有「爆粗大狀」之稱嘅馬恩國，早前同佢同父異母家姐馬蕭蕭爭產鬧上高院，單案仲未判，近日佢又再俾家姐告，今次告佢誹謗。
話說馬大狀6年前同《明報》做訪問，當時佢不但叫馬蕭蕭做「哎吔家姐」，仲話對方唔肯接收亡父、愛國畫家馬家寶嘅畫作，形容對方「視畫作如爛紙」，但後來知道啲畫有價就想「取着數」要番。
馬蕭蕭話篇訪問令佢好尷尬，講到佢唔係馬家寶親生同成個騙子咁，亦有損佢喺本地藝術界嘅清譽同移民顧問嘅身份，所以決定告細佬、《明報》嘅編輯鄭利群同明報報業有限公司，要佢哋賠償同唔再刊登呢篇報道。
其實馬大狀唔係首次「禍從口出」，佢試過喺立法會鬧長毛「You are even not a fxxking Chinese」而俾大律師公會停牌一個月。
馬大狀回覆指，知道俾人告誹謗都覺得驚訝，唔明點解馬蕭蕭要事隔成6年先告，重話對方𠵱家先話要禁制發佈6年前嘅新聞係荒謬，「新聞出晒街，唔係新嘢，係好outdated嘅material」。