36歲嘅張景淳，11年憑住劇集《天與地》演許家明一角而嶄露頭角，但之後就再冇乜代表作，反而佢嘅戀情就比較有新聞性，佢同宋雙佳、前HotCha成員張惠雅（Regen），與及Regen嘅前男友沈瞳伽（Esta）嘅四角戀，就真係好有戲劇性喇！
話說張景淳早年就已公開有一個女友，就係曾參選《2008年國際中華小姐》宋雙佳，佢哋仲不時咁喺網上晒恩愛，點知14年10月，佢張景淳就同宋雙佳陷入冷戰。正當冷戰時，張景淳就要去武當山拍攝《潮拜武當》，不甘寂寞嘅佢，喺武當山遇上當時有男友嘅Regen，形成一個複雜嘅四角戀。
宋雙佳知道男友張景淳搭上Regen後，佢就好決絕咁要分手啦，但男方就唔想放棄呢段情，15年就俾《蘋果》影到張景淳喺上環皇后大道西，愁眉苦臉咁係到等宋雙佳，等咗成個鐘，宋雙佳先出現，張景淳一見到宋雙佳就即刻上前，跟手仲捉住女友手不停講嘢，但女友就咩反應都冇，咁張景淳就越講越激動，更加邊講邊喊，又扁晒嘴，好鬼可憐咁。
最後張景淳都o氹掂咗女友上車，之後佢哋去到將軍澳一個樓盤地盤附近停下，男方又再哀求女友回心轉意，見佢講到喊晒，臉容扭曲，最後女方就好大聲：「總之唔會啦，我接受唔到囉，唔好咁啦你！」( 新聞連結： http://bit.ly/2pDUPKH )
雖然當日張景淳未能夠箍煲成功，但原來張景淳都冇放棄咁出冧功，最後都俾佢o氹掂女友，仲俾周刊影到佢哋車廂激吻㖭！