周日北倫敦打吡，作為阿仙奴球迷，確係令小弟睇得坐立不安，最唔開心唔係以0:2敗陣，熱刺亦都22年後肯定英超排名高過兵工廠；如果互有攻守下僅敗，相信廠迷可以接受，最難過係一眾阿仙奴球員踢來冇嚟火氣，最有鬥心竟然係最老嘅門將施治，其他球員好似對勝負漠不關心，打吡戰、爭前四？都似乎冇乜所謂。
阿仙奴輸波，賽後當然亦都引發新一輪領隊雲格（圖）去留問題，坦白講，哀莫大於心死，炒唔炒雲格對小弟已經冇乜大反應。挾戰績換領隊嘅陰謀論，呢幾年英超真係見唔少，車仔上季由摩連奴帶到攻不強守不銳，今季換咗干地，加咗幾個球員就踢到爭標；上季冠軍李城今季初護級，炒咗雲尼亞里後，𠵱家不單護級成功，仲有機會上前半版㖭。
但事實上炒領隊係唔係扭轉戰績嘅靈丹妙藥？英超東北雙雄新特蘭同米杜士堡，一隊就篤定降班，一隊就九降，佢哋處理領隊位置都唔同，新特蘭係護級球隊中唯一一隊冇炒領隊嘅球隊，由季初一直由莫耶斯執教，上周六護級最後希望主場對般尼茅夫，雖然以0:1見負，不過球員就真係對得住球迷有餘，老將迪科爾、奧沙都搏到盡，最後空群出擊輸一粒，只能嘆句時也命也。米堡周日就錯失大好機會，兩度領先下被曼城逼和，雖然從曼城身上拎到一分，叫做輝煌戰果，但𠵱家拎一分對米堡幫助都不大。其實米堡三月炒咗前領隊卡蘭卡，由助教艾紐接手後，戰績都係冇乜改善，接手之後贏過一場咁大把，就係護級大戰兼東北打吡小勝新特蘭。
換又死唔換又死，除咗東北雙雄，都可能係阿仙奴面對緊嘅問題。
文︰牽牛