港股話踏入「五窮月」,其實都未必要睇得咁淡,樓市更加係好熱鬧,今日起碼有3個新盤做推介,包括長實(1113)海之戀同四叔旗下恒地(012)翰林峰,恒地原本仲想推埋大坑樓盤貨尾,為避開自己打自己,都要讓一讓。本月多新盤出籠,其中,恒地旗下西營盤新盤翰林峰未開售,早兩日已搵來「神奇小子」曹星如造勢,另一邊廂,佢位於大坑嘅貨尾盤雋琚,都想同步推銷,原本兩個盤今日都有宣傳活動,最後雋琚讓路喇。