無綫劇《不懂撒嬌的女人》今個禮拜首播。綜觀頭兩集，劇情都算明快，加上對白抵死，港女、賤男共冶一爐，加埋4K同全實景拍攝，畫面同質素確實比起以往喺廠景拍嘅劇高幾班。
講番劇情，大致都係一對久違咗嘅過氣戀人─林文龍同宣萱喺職場上重遇，結果變成火藥味甚濃嘅冤家。加上唐詩詠做嘅苦命家嫂，俾賤男友黎諾懿呃感情，同埋王浩信無賴搞笑嘅裝修老闆，雖然話幾個女仔圍埋講仔經，似足春嬌同老死「腿張開」劇情，不過整體嚟講，算係近排比較有誠意嘅作品。
不過劇情要鋪排，實際啲，灑吓鹽花就可收即時效果，所以喺頭兩集，劇中都有大量低胸大特寫鏡頭，真係胸唔嫌多，最緊要有得encore。而喺親子王國網站中，就有唔少網民讚套劇對白抵死啜核，節錄如下：
--冇關係，香港係A Cup之城
--你老闆，胸真係大過我個頭；人哋係警鐘胸，佢仲大個大笨鐘
--事業線嘅嘢，一吋長，一吋強
--唔怪得咁多男人鍾意返內地工作，因為佢哋全部都用下面思考
--所有返大陸做嘢嘅男人都會淪陷
--斷人衣食，猶如殺人父母
--每個女人嘅保鮮期唔會超過一年
--最憎「岳」高頭同人講嘢