【旅遊籽：大阪新玩】
日本環球影城今年適逢開幕15周年，上月便新開了新園區「迷你兵樂園」贈興，將九萬呎的前《回到未來》區粉飾成一片黃澄澄，成為繼哈利波特後的第九個加盟新區。
重點機動遊戲「迷你兵團調皮百厭乘車遊」（Minion Mayhem），透過Hybrid 5K技術虛擬投射影像，讓玩家坐入太空飛船，毋須戴3D眼鏡都可以感受到天旋地轉的速度感。全程約18分鐘，虛擬過山車不算太刺激，大人細路都啱玩。由於新開幕，至少需排隊兩小時，要減省輪候時間，則可加$360在官網購買特快通行證，以便你可把握機會捉實迷你兵拍照，及提早霸頭位睇巡遊。巡遊每日有4場，多隻迷你兵會穿上電影內的經典盞鬼造型，如女僕、白色西裝、孖辮裝扮，完騷後粉絲可趁機埋身合照。
可愛爆燈造型小食
當然不少得主題美食，如每日限量發售的皇袍加身King Bob爆穀桶，先要在入園後第一時間領取整理券，再於特定時間才可購買，每個售價2,980日圓（約208港元），內裏裝有朱古力香蕉味爆穀，正正是迷你兵至愛的口味，直至6月底前入場都買得到！正餐及小食亦都化身成迷你兵造型，其中單眼曲奇夾着厚厚一層烤棉花糖和雜果雪糕，每件500日圓（約35港元），外層鬆脆，夾心甜而不膩。另有手信店位於園區的西翼，粉紅夢幻色調非常搶眼，酷似一部巨型香口糖機，不少㗎妹掃貨前都乘機打卡。店內則有齊背囊、自拍棍、迷你扭蛋機等新推精品，試問點忍得手？
光雕投影催狂魔特襲
玩完迷你兵樂園，入夜時間最好到哈利波特園區睇首個大型光影騷。由即日起至11月，霍格華茲城堡將配合光雕投影，在煙霧包圍下，懸吊半空的催狂魔旋繞城堡周邊，氣氛緊張。最佳觀賞點為黑湖旁邊，當真人哈利波特成功戰勝邪惡，城堡便會由一片冰藍燃亮成火燄色，並以煙火作結，觀眾都拍手叫絕。另外，玩點「三本の箒」也加入了新魔法，唸咒可變出火花，揮動魔杖，天空更會下起雪來，參與度高，互動好玩。
日本環球影城
地址：大阪市此花區櫻島2-1-33
電話：+81 (0) 6 6465 3000
票價：一日券成人約532港元，小童約357港元。
交通：JR日本環球影城站即達
網址： http://www.usj.co.jp
相片提供︰日本環球影城
記者：陳海利
編輯：黃世恩
美術：楊永昌