唔經唔覺，候任特首林鄭月娥當選都一個月有多，八方睇過，5年前呢個時候，同樣係候任特首嘅梁振英，組班工作經已搞到七七八八，傳出街嘅名單都同最終結果相差不遠，但係奶媽組班又組成點呢？噚日政府就發出採訪通知，奶媽今朝10點3就會喺候任辦開記招，莫非佢有重大宣佈？
八方聽聞過今日奶媽出嚟唔係講組班，而係講候任辦主任嘅人選，即係好似5年前羅范椒芬幫梁振英做候任辦主管咁樣。之後有行家更加八到，出任林鄭候任辦主任嘅人選，正正係盛傳會做林鄭特首辦主任嘅前入境處處長陳國基。
陳國基就出咗名面面俱圓、處事手腕圓滑，相信由佢去做啲聯絡、溝通嘅工作問題不大，尤其林鄭早前見完各大主要建制派政團後，今個月就要同民主派各政團碰頭，林鄭搵番個唔鍾意撩事鬥非嘅人幫未必係壞事嚟嘅。