《綠袖子》可能係幾代香港人發考試噩夢嘅背景音樂，事關考試局（於2002年易名為考評局）1995年起，先後喺公開試英文同中文聆聽試播《綠袖子》，畀考生測試訊號，一首歌橫跨會考、高考同文憑試，到𠵱家播足22年。1996年卸任嘅考試局前副秘書長京力士（Rex King）當年有份揀歌，佢近日親自解話，係因為考試播流行曲、古典音樂都唔多啱key，而英國民謠《綠袖子》就中間落墨，而且旋律夠簡單，順利跑出。
八方查過資料，《綠袖子》喺16世紀開始喺英國民間流傳，相傳係英國國王亨利八世，作畀情人安妮．博林嘅歌，但其實亨利同安妮嘅愛情故事都幾悲。安妮相傳係皇后嘅女侍官，但同亨利暗生情愫，雖然兩個人排除萬難結咗婚，安妮仲做埋第二任皇后，但最後都係被告通姦兼處死，亨利之後好快再迎娶安妮嘅一個侍女，成為佢嘅第三任皇后。
每次須付版權費
不過考試局當年揀歌，係完全冇考慮呢個愛情故事嘅。京力士話，1995年係第一次喺香港電台播錄音，開考前、考試中段都一定要播音樂，唔可以留白，所以要搵首旋律輕柔、曲調簡單嘅音樂，佢就覺得《綠袖子》係中間落墨嘅好選擇啦。考評局𠵱家採用嘅係倫敦交響樂團演奏嘅《綠袖子》，港台每次用都會向樂團交番版權費嘅。