姚瑩瑩喺電視圈打滾多年，曾經都上過高峰，不過近年嘅佢，就一直都係做啲三四線角色，甚至連名都冇，但其實姚瑩瑩係點入行呢？就係關袁詠儀(靚靚)事嘅。
喺1991年，姚瑩瑩就參加新加坡小姐，仲攞埋冠軍，之後就參加咗91年嘅環球小姐，咁啱就同靚靚同房，兩個一拍即合，變到好好朋友，後來瑩瑩有意嚟香港發展，靚靚出手相助。
當年瑩瑩嚟到香港，本身就住喺上水大伯嘅屋企，但交通唔方便，加上要成日去移民局，所以靚靚就叫咗瑩瑩去佢屋企住，一住就住咗差唔多一年，當時瑩瑩冇收入，靚靚又未入電影圈搵真銀，但都唔收瑩瑩租，真係患難見真情。
瑩瑩曾經講過好感激靚靚，仲話同靚靚係患難之交，但近年少咗好多見面，不過生日都會寄生日卡畀對方。除咗靚靚，瑩瑩同靚靚媽媽都好熟，有時仲有一齊出嚟食飯，靚靚媽媽見到瑩瑩面色唔好，都會買藥材畀佢煲湯，當正佢係契女咁。