練馬師葉楚航與佛有緣？今日（3日）佛誕公眾假期，晚上快活谷賽事葉楚航旺氣逼人，頭場由李寶利贏「紅星」後，第二場五班1800米葉楚航再下一城，以見習騎師巫顯東操刀之「心中有善」建功，令葉廐火速起孖，而「心中有善」單Win及組合獨贏A2分別派44.5及19元。
「心中有善」大前仗於2月上旬由潘頓贏五班谷草一哩開齋，加咗分之後，近兩戰都贏唔到分別跑三、四名，呢次初配有十磅減的巫顯東改跑1800米，閘前落飛變次熱，沿途前置望空均速跑主動，對面直路初已帶出，對手「盛勢東方」沿途不斷力追，但始終無法逼近真正構成威脅，「心中有善」維持勁勢先過終點，輕勝2.25馬位，服役第二次贏馬，亦令小將巫顯東連續第三次賽事建功，更帶挈落飛黨中番隻綠燈4.4倍Win。
葉楚航指「心中有善」今仗順利取勝，主要靠巫顯東減十磅的威力，他並大嘆說：「十磅仔真是好難book呢！」航哥指此駒上場潘頓跑第四，其實沒有跑錯，只可惜形勢不利，遇上快步速，令馬兒跑來十分辛苦，今場沒有快馬，他給巫顯東的策騎指示是守前列，東仔做足要求，令馬兒放得舒服，故此能順利取勝。
第二場二至四名順序為第三熱門「盛勢東方」、冷門「馬來之珍」及大熱門「威德將軍」，四重彩派5,577元。其中「盛勢東方」馬主之一著名導演杜琪峯首次做馬主，愛駒連續第二次做阿二，令佢仲未可以一嘗拉頭馬滋味。