前立法會主席曾鈺成為ViuTV主持節目《埋班》，噚日搵嚟黃秋生喺觀塘錄影節目，兩人會煮幾味，秋生話事前唔知會講乜話題，文化、藝術、天南地北乜都講得：「我又唔係專家，主席講乜我咪講乜囉。」據聞會講到特首埋班，如果主席做特首，秋生想做乜職位？秋生即刻話：「做食環囉，可以管理飲食、垃圾、捉老鼠同曱甴 ，冇嘢搞就搵嘢嚟搞。」跟住佢又語帶雙關話：「我都係鍾意做食環，邊間舖旺就搞邊間，邊度賺錢就去搵邊間舖，帶人去踩場查牌，總之搞到死為止。」
笑徐曉冬野蠻
有傳陳美齡出任教育局局長，秋生話：「我聽聞佢話自己三個仔都係入讀史丹福，如果以呢個為標準的確有問題，冇入史丹福不知幾多，成功嘅人都大把， 咁係咪如果我讀耶魯或劍橋都唔得呢？教育唔係以呢個標準嚟衡量。」講到內地MMA拳手徐曉冬K.O.內地太極選手，𠵱家全城向徐曉冬挑機中國武術，秋生直言：「𠵱家好似50、60年代嘅香港，一個地方越落後越多呢啲情況，落後嘅標誌係野蠻。」
撰文：馮仁昭
