英超嚟到季尾，本報嘅焦點都放喺爭標同爭前四嘅形勢上面，好少講護級，因為版面有限，前列球隊又多支持者，講前列形勢多人睇過講護級。藉呢日嘅《咖喱牛腩》，我同牽牛兄會講一講家陣英超嘅護級。
包尾嘅新特蘭已經降咗，尾二嘅米杜士堡生還機會唔大，小弟覺得第三隊降班嘅不外乎尾三嘅史雲斯（圖）同尾四嘅侯城。尾五嘅水晶宮有38分，離英超傳統護級成功嘅40分界線只差兩分，加埋有護級專家艾拿迪斯帶隊，小弟覺得水晶宮護級都十拿九穩。史雲斯35戰得32分，而侯城就35戰34分。睇分數，侯城佔優，但睇賽程，史雲斯有機會絕地反擊。
侯城喺馬高施華帶隊，主場成績大有改善，今年七場主場聯賽六勝一和，但作客依然唔掂，佢上任後侯城客場仲未贏過。嚟緊最後三場聯賽，侯城先對新特蘭，相信三分穩陣，但之後作客水晶宮就凶多吉少，最後一場主場對熱刺，真係吉凶參半。去到煞科日，大膽估計熱刺已經篤定亞軍，究竟熱刺到時抱咩心態去對侯城，就決定侯城嘅生死。
至於史雲斯近況有好轉，先贏史篤城再和曼聯，搶咗四分。嚟緊最後三輪，史雲斯嘅對手都係無欲無求嘅中游球隊，先喺主場對愛華頓，再作客新特蘭，煞科日就會迎西布朗。愛華頓好似幾強，但已經三個月未試過作客贏波，已降班嘅新特蘭已成任人魚肉之輩，所以小弟大膽估計，喺尾二一輪，史雲斯或者可以超越侯城。
文：咖喱