樂隊Mr.成員譚健文（Dash）於上周二發生交通意外，當他駛至九龍灣時被一架水泥車切線鏟埋身，Dash的座駕被撞到拖行，右邊車身嚴重凹陷，後面車門更加撞到打開，當時車內還有Dash的爸爸。前晚Dash在社交網轉載一段影到意外一刻的車cam短片，並留言：「希望網路世界可以為我愛車找回一個公道。」謝安琪、Dash弟婦朱薰都轉發，呼籲大家聯絡影片片主。
「一句道歉都冇」
Dash昨在電話表示：「好好彩人冇乜大礙，撞親少少，但自己好緊張爸爸，佢坐隔籬，最緊要佢冇事。」他回想事發經過仍猶有餘悸：「當時我想過線，向前行時，睇片見水泥車畀油cut線，佢好明顯見我唔到，一撞嗰吓，我定住架車，唔畀佢周圍郁動，好驚撞到其他嘢，真係會傷到阿爸，之後警察、消防、救護都到咗，消防員好緊張問有冇事？自己都嚇一嚇，出奇地自己落到車，我喺乘客位爬出車。」
問到水泥車司機怎解釋？Dash谷氣表示：「佢行埋嚟問：『你喺邊度唧出嚟？』我好㷫，望住佢鬧咗兩句：『你𠵱家撞到我，人都唔知有冇事，你問我邊度唧出嚟？』佢一句道歉都冇，有乜事，佢道歉我都聽唔到。我希望道路使用者要安全，就算邊個錯都好，關心吓人有冇事先。」問到傷勢，他說：「肋骨梗住，去醫院照X光，畀咗止痛藥同藥膏，唔使留院，咁多玻璃碎飛埋嚟，我只係手腕撞親，爸爸擦傷仲多過我，我同佢都有暈，佢心口悶住，心情難平復，再次多謝救護人員，佢哋好緊張我阿爸，話老人家可能當時嗰刻冇事，但之後可能有唔同問題出現，叫我留意。」
媽咪拜佛感恩
幸運的是，Dash跟爸爸接受治療後出院，真係好大命，他說：「係呀，我睇番條片，真係好好彩，因為媽咪係佛教徒，咁啱嗰日佢拜佛，冇喺車入面，我真係好感恩，阿彌陀佛，車事少，人係最緊要，我覺得車cam真係好緊要，可以幫到其他人。原來有幾個車嘅群組po咗呢條片，暫時未聯絡到影片片主。」Dash透露當時自己時速只有四十幾：「條片見到佢撞埋嚟冇煞車，佢仲係畀住油咁去，我架車畀佢撞完之後拖行四十米，當時感覺只係：『人冇事、人冇事、人冇事！』之後揸車都有陰影，𠵱家揸Mini Cooper，經過見到大車都慢慢駛。」警方發言人回覆指重型貨車切線撞到私家車，兩個司機吹波仔都合格。
採訪：皓騫