香港嘅電視台因為數目唔多，所以啲藝人走嚟走去都係嗰幾個台，就算係已經冇免費電視台牌照嘅亞視，一直被視為「弱者」，但佢都出過唔少當紅藝人，而嗰啲藝人都先後過檔「對家」無綫，部分人至今仍有效力，甚至有個更好嘅發展平台。
身為亞視「招牌」之一、擁有42吋長美腿嘅萬綺雯（蚊蚊），係1989年度亞洲小姐亞軍，當年已為大熱嘅佢同年簽約亞視，隨即被力捧，拍攝劇集《司機大佬》時已為第二女主角，夥拍同屆嘅伍詠薇以及老戲骨吳耀漢等人。喺亞視效力23年以來，蚊蚊嘅代表作必數《我和殭屍有個約會》系列嘅馬小玲、《勝者為王》系列、《大提琴與點38》及《萬家燈火》等。到2012年，蚊蚊約滿亞視，轉投無綫懷抱，翌年播出嘅《老表，你好嘢！》即擔正演出，其後喺《食為奴》及舊年播完嘅《致命復活》均為擔正，機會無限。
由亞視過檔嘅另一代表，唔少得憑黑絲上位嘅江美儀，江美儀於1997年因被星探發掘做模特兒，其後加入亞視，佢參演過《肥貓正傳》系列、《影城大亨》、《吉祥任務》等亞視劇集。到2012年江美儀轉投無綫，最為人熟悉嘅係佢喺《名媛望族》中飾演三姨太，其中一場着住黑絲嚟情挑劉松仁嘅戲，成為一時佳話，亦令佢有「黑絲儀」嘅外號。江美儀憑《女人最痛》及《名媛望族》等劇集先後入圍《萬千星輝頒獎典禮》最佳女配角，可惜未能獲獎，直至2013年終憑《衝上雲霄II》勇奪最佳女配角。
其後過檔到無綫嘅陳煒，係1996年亞姐冠軍，其後獲安排拍攝《雪花神劍》及《美麗傳說》等劇集，幾年間已躍升為亞視當紅花旦。2008年陳煒嫁畀台灣商人顏志行後宣佈息影，到2012年因戲癮復出，有指喺江美儀引薦陳煒入無綫，陳煒其後接拍《東坡家事》及《火線下的江湖大佬》劇集，戲分頗重。
至於較早「跳船」過檔嘅姚嘉妮，係1998年亞姐季軍出身，拍過《英雄廣東十虎》等劇集；但佢喺2001年就已經轉投無綫，其後拍過《花樣中年》、《盛世仁傑》、《愛‧回家》系列等，最近一套作品係《財神駕到》。除咗劇集，姚嘉妮亦有主持《都巿閒情》等節目。