立法會財委會噚日通過民主派極為反對嘅迪士尼擴建撥款後，估唔到一波未平、一波又起。
社民連「長毛」梁國雄因不滿財委會主席陳健波偏幫政府，縱容政府喺政府提交嘅文件中、英文版本不相符下，繼續向立法會遞交撥款60億元、加入亞投行嘅申請，動議終止有關撥款時自嘲係「egghead」，而陳健波就係「dickhead」，俾陳健波話佢講粗口、趕離場，但陳健波即時俾議員踢爆，原來佢之前阻止議員發言，一樣疑似爆粗X唔聽話議員。
話長毛講dickhead係粗口
長毛俾陳健波話爆粗，佢即時反駁話講dickhead唔係想講粗口，意思只係「不可理喻、好蠢、好煩嘅人，即係儍瓜」。
最先踢爆政府寫錯文件嘅人民力量「慢必」陳志全就話，最先疑似講粗口嘅，其實係陳健波自己，並展示陳健波叫停議員發言時，一度疑似講「X你再講嘢，我要停止你發言」片段。
陳健波會後繼續炮轟長毛，話有幾位在場女性同佢反映，因dickhead一詞感到被冒犯，包括官員謝曼怡，強調自己好憎人講粗口。
被問到佢自己亦疑似爆粗時，陳健波開頭死口話冇，反問記者佢幾時講粗口？其後重溫疑似爆粗片段後，陳健波好尷尬咁話當時只係講「如果」，自己只係「甩嘴」、「講歪咗」，話如果大家聽到覺得係粗口，佢都覺得要同大家道歉，強調以後「都要盡量講番正啲」。
英語專家、獨立議員毛孟靜噚日就話，查過Oxford同Cambridge字典，dickhead一般意思係「愚蠢、可笑、乞人憎，或者令人非常厭惡」，認為陳健波唔應該隨便話人講粗口喎。
李八方