利物浦禮拜一險過剃頭，靠安利簡恩倒掛金勾射入金球，作客贏屈福特1:0，繼續排第三位。因為曼市雙雄周日失分，所以利物浦家陣拎住爭前四嘅主導權，只要嚟緊三場波贏晒，佢哋就唔使睇其他隊面色，肯定有前四名。
紅軍開波冇耐先折將，菲臘比古天奴腿部受傷，喺13分鐘退下火線，但呢位巴西中場賽後喺社交網站話傷勢唔嚴重，睇嚟下場有機會出。可能冇咗古仔啦，紅軍雖然佔較多控球，但一直攻唔入。去到44分鐘，利物浦中場盧卡斯決定鋌而走險！或者盧卡斯禮拜日都有睇波，見到拉舒福特同利萊辛尼話咁易就博到12碼，所以唔執輸，又插一插，點知被球證睇通，食咗面黃牌，睇嚟盧卡斯演技有待改進嘞。
要入波唔一定靠插水博12碼嘅，盧卡斯喺半場補時階段斬波入禁區，安利簡恩嚟吓神來之筆，打倒掛射入，幫紅軍領先1:0。呢個入波被英媒稱為可以候選今季金球！簡恩都話不可思議，「我從未入過咁嘅波，可能細個入過都唔定，但呢球應該係我入過最靚嘅波。」利物浦靠簡恩嘅世界波一直領先，直到下半場補時階段，差啲要嘔番兩分出嚟。屈仔斬高波入禁區，輾轉去到遠柱無人看管嘅普特爾腳下，佢嘅射門中楣彈出！利物浦先保住1:0勝局到完場。
餘下三場鬥弱旅
有驚無險，紅軍趁曼市雙雄同阿仙奴失分嘅同時全取三分，爭前四形勢樂觀。只要之後對中下游嘅修咸頓、韋斯咸同米杜士堡三場聯賽贏晒，利物浦就肯定有前四名。
