近日唔通知傳媒落區嘅梁振英，噚日俾傳媒問到，最近密密落區係咪洗底，梁振英梗唔認，仲話佢2012年7月上任嗰個月，同司局長主動落區，但反對派組織大量人在門口示威、堵塞交通，就少咗落區。嘩，乜反對派咁有成就㗎？反對派叫佢落台叫足5年，點解佢又唔落嘅？翻查資料，當年梁振英落區，保皇黨「涉嫌虐老」，竟然叫啲公公婆婆凌晨就要去會場外面排隊，霸頭位入去會場，製造會場內嘅太平盛世，點知個個長者入到去，瞓到成隻豬咁，連自己排隊為乜都唔知，八方對呢啲畫面仲記憶猶新。
當年佢一落區，頭痛嘅唔係反對派，而係警方。因為為咗要護送呢位貴賓，警方又要築起人鏈，當時佢連續3星期落區做騷，無論對警方、對長者、對反對派、保皇黨，真係噩夢一場。近日梁振英落番區，都唔再事前通知傳媒。